હિમાચલ પ્રદેશના લાહૌલ-સ્પિતિ જિલ્લાના દૂરસ્થ અને દુર્ગમ પાંગી ખીણમાં શુક્રવારે એક મોટો ખડક પડતાં ટાટા સુમો વાહન કાટમાળ નીચે કચડાઈ ગયું હતું, જેમાં છ મહિનાના બાળક સહિત 13 લોકો માર્યા ગયા હતા.
આ વિસ્તારમાં છેલ્લા ઘણા દિવસોથી ભારે વરસાદ પડી રહ્યો છે. ઉદયપુર-પાંગી રોડ પર કરુણાલા નજીક આ અકસ્માત થયો હતો, જ્યાં પર્વતનો એક મોટો ભાગ તૂટીને વાહન પર પડ્યો હતો. કાટમાળ નીચે દટાઈ જવાથી વાહનમાં આગ લાગી ગઈ હતી. વાહનમાં સવાર 15 મુસાફરોમાંથી બે અકસ્માત પહેલા જ વાહનમાંથી કૂદીને બચી ગયા હતા. વાહન કુલ્લુથી પાંગી જઈ રહ્યું હતું.
લાહૌલ-સ્પિતિના ડેપ્યુટી કમિશનર કિરણ બદનાએ જણાવ્યું હતું કે વાહનમાં ડ્રાઇવર સહિત 15 લોકો સવાર હતા. વાહન ઉદયપુર-કિલાડ રોડ પર પાંગી ખીણ તરફ જઈ રહ્યું હતું, જે એક દિવસ પહેલા ભૂસ્ખલનને કારણે બંધ કરવામાં આવ્યું હતું. બોર્ડર રોડ ઓર્ગેનાઇઝેશનના કર્મચારીઓએ અકસ્માત બાદ તાત્કાલિક બચાવ અને રાહત કામગીરી શરૂ કરી હતી.
ઘટનાનો વિડીયો જોવા અહીં ક્લીક કરો.:- Click Here
ભરમૌરના ધારાસભ્ય જનક રાજે જણાવ્યું હતું કે ચંબા અને લાહૌલ-સ્પિતિના ડેપ્યુટી કમિશનરોને રાહત અને બચાવ કામગીરી ઝડપી બનાવવા સૂચના આપવામાં આવી છે.
પોલીસના જણાવ્યા અનુસાર, ઉદયપુર-કિલાડ રસ્તો બંધ થવાને કારણે મુસાફરો એક દિવસ પહેલા ટીંડીમાં ફસાયા હતા. રસ્તો ફરી ખુલ્યા પછી તેઓ પાંગી જવા રવાના થયા હતા.
પાંગીના રેસિડેન્ટ કમિશનર અમનદીપ સિંહે જણાવ્યું હતું કે લાહૌલ-સ્પિતિ પોલીસ અને સ્થાનિક વહીવટીતંત્રની ટીમો તાત્કાલિક ઘટનાસ્થળે દોડી ગઈ હતી. કિલાડ-ઉદયપુર રોડ, જે મુશ્કેલ ચંબા પ્રદેશમાંથી પસાર થાય છે, તે ચોમાસાની ઋતુ દરમિયાન વારંવાર ભૂસ્ખલન અને ખડકો પડવાની સંભાવના ધરાવતો હોવાનું જાણીતું છે.
ખરાબ હવામાન અને સતત પડી રહેલા કાટમાળ રાહત અને બચાવ કામગીરીમાં નોંધપાત્ર મુશ્કેલીઓ ઉભી કરી રહ્યા છે. વહીવટીતંત્રે જનતાને અપીલ કરી છે કે તેઓ કોઈપણ અફવાઓ કે અપ્રમાણિત માહિતી પર વિશ્વાસ ન કરે અને વહીવટીતંત્ર દ્વારા જાહેર કરવામાં આવતી સત્તાવાર માહિતી પર જ આધાર રાખે.
ભારતીય હવામાન વિભાગે 26 જુલાઈ સુધી રાજ્યના ઘણા જિલ્લાઓમાં ભારે વરસાદની આગાહી કરી છે.
મુખ્યમંત્રી સુખવિંદર સિંહ સુખુએ અકસ્માતમાં ૧૩ લોકોના મોત પર ઊંડો શોક વ્યક્ત કર્યો હતો. તેમણે લાહૌલ-સ્પિતિના ડેપ્યુટી કમિશનરને તાત્કાલિક ઘટનાસ્થળે પહોંચી રાહત અને બચાવ કામગીરીનું નિરીક્ષણ કરવા નિર્દેશ આપ્યો હતો.